فى البدايه .. اسمع ذلك الصوت الوقور العجوز القادم من اللا مكان يقول : " ارجو من سيدتى شد الغطاء استعدادا للانطلاق"....و بدأت الرحلة ... حسيت بان كل حاجة حواليا رقيقة و الهوا اللى فى لسعة برد بيعدى على وشى و بيحرك شعرى, ساعتها بس عرفت انى هناك...
عرفت انى وصلت...بصيت حوليا ..هو ده .. هو ده العالم بتاعى ...بدأت امشى فيه شويه علشان اكتشفه ..و رغم انى هنا الاميرة الا ان العالم ده لسه اغلبه مجهول بالنسبالى...
و فضلت ماشية...قعدت ادور على بنى ادمين...مالقيتش..خفت...حاولت اتناسي خوفى...
فين الناس؟..
بصيت لاقيت عصافير كتير واقفة على شجرة عالية ديلها ملون و جناحتها كبيرة..اول ما شوفتها عرفتها دى احلامى...جريت وراها .. طارت ... قعدت اجرى حاولت احصلها .. اتكعبلت ..وقعت..لقيت حد بيقومنى..ببص لقيتهم اتنين اصحابى قريبين اوى ..
انتوا كنتوا فين ؟ انا كنت فاكرة نفسى لوحدى..احنا موجودين بس انتى اللى مدورتيش كويس...كل الناس اللى بيحبوكى موجودين...
قومى .. مقدرش ..طيرى ورا احلامك..بس انا مبعرفش اطير..خليكى واثقة فى قدراتك...غمضت عينى..
و نطيت عالى اوى .. و لما فتحتها لقيت نفسى طايرة...
انا طايرة..انا بعرف اطير!!
انا مبسوووووطة..لمست السحاب .. و وقفت عالشجر العالى .. قدرت امسك عصفورتين تلاتة... بس لسه فى عصافير تانية كتير اوى..
بس لما بصيت عالارض..لقيت اغلب عالمى ضلمة..مجهول معرفش عنه حاجة..استغربت...و فى عز مانا مستغربة...
لقيت واحد اول مرة اشوفه..واحد متسلل للعالم بتاعى؟؟..دخل من غير ما ياخد اذن الاميرة!!
نزلت اشوفه..لقيته ماسك فى ايده عصفورة غريبة...
اول ما شافنى ابتسم..ساعتها بس حسيت بقلبى بيدق لأول مرة..ابتسمتله..مد ايده يديلى العصفورة..جيت امسكها..
طارت..مديت ايدى امسكها بعدت .. ساعتها مسك ايدي و طرنا احنا الاتنين وراها نحصلها..
و بدأت الاجراس ترن....
تررررررررررررررررررررررررررررن!!!!!!
المنبه..فتحت عينى بصيت عالاوضة ...
هى زى مانا سبتها ..
2 التعليقات:
منه مبدأيا
احساس جميييل اوي حسيته حسيت بنفس نسمه الهوا اللي بتوصفيها
حسيت بدمعه دافيه في عين من فرحتي بوصفك و من كتر منا حايه اني معاكي هناك ..
منه انا احساسي مش عارف اوصفه
مش عارف اقول اكتر من انك دخلتي بابوست ده المكان اللي مدخلوش حد من زمان جوايا
طبعا الجزء الاول والخاص بنسمة الهوا كان كافى جدا انى يرجعنى من الشغل على هنا علطول عشان اقرا الباقى .. تخيلى فضلت البوست عن الغدا !!! :)
اما بقى لو تعاملنا عن معنى الحلم سواء واقع او لا :
متقلقيش عصافيرك اتسلى واجرى وراهم بهدوء الحكيم وسرعة الجنون ( يظهر الكلام الكبير اللى سمعته امبارح أثر على دماغى )
اما بالنسبة ان معظم عالمك ضلمة فاقدر اقول استمتعى بمتعة اكتشافه ومتنسيش ان كل انسان فى الحياة فى جزء كبير اوى ميعرفوش عن نفسه وبيفضل يكتشف خبايا نفسه فترات كبيرة اوى وفى الاكتشاف نفسه متعة خاصة مش هتحسيها غير لما تحسى بنور اضافى نور فى عالمك :)
واخيرا اكسرى المنبة اللى جنبك ده بقى عشان خنقنى جرررررررررررر
عن البوست نفسه بجد اسلوبه فوق الرائع عجبنى جدا وحسيت فيه معنى الحلم بجد ( اقصد انه حلم حلم يعنى بضمير مش حلم اى كلام) وعجبنى اكتر انى متذكرة التفاصيل :) .. بعد الكلمتين دول لو فقدتى الذاكرة اكيد مش بسببى :)
إرسال تعليق