الأحد، 28 ديسمبر 2008

دلوقتى اقدر اقول و بكل ثقه
انى رجعت اتنفس تانى

السبت، 13 ديسمبر 2008

يا أيها الطفل الصغير اللى نايم و مش حاسس بالدنيا
و مش شايل هم حاجة
يا بختك
استمتع باللحظة دى على قد ما تقدر
لانه هييجي اليوم اللى هتكتشف فيه
ان عمر ما قوس قزح كان بيمطر بون بون
ده مجرد انكسارات للضوء
و ان مفيش فوق السحاب عالم الاحلام
ده مجرد بخار ميه
انه مش لازم اصحابك يخافوا عليك
و ان الكلام مش لازم يبقي كله صدق
و المشاعر مش لازم تبقي كلها حقيقيه و صافيه زيك كده
و حتى الحب هتلاقيه مغشوش
هتحتار بين الصح و الغلط
ساعتها مش هتقدر تروح فى النوم بالسهوله دى
و مش هتحس بلحظه صفاء زى اللى انت عايشها دى
فاستمتع على قد ما تقتدر

الأربعاء، 3 ديسمبر 2008

منتهى السعاده


تاتتاااتى تاتا هممممممم تاتاااااااا
فى ايه مالكم انا بس بدندن
عارفين بغنى ايه؟
يوم جميل..و لو ركبنا فيل ..
مكنتش هبقى مبسوووووطه قد انهارده
صحيح قمه السعاده انك تلاقى حد انت بتحبه فى منتهى السعاده
و تكون انت السبب
تاتاتااااا و يوم جميل
ملحوظة صغيورة:الاغنيه دى كان ليها مناسبه لحسن حد يفتكر انى بدأت اكتب شعر و يجيله احباط:)

الاثنين، 17 نوفمبر 2008

(قصه قصيرة) الهروب الكبير..


أريد أن ابكى أريد أن اتكلم لكن للاسف دموعى نضبت و انتهت الكلمات..
كان هذا هو ما دار بذهنها اثناء سيرها وحيده على الرمال متأمله لماء البحر
هى لم تكن تتحدث الي البحر او تشكى له حالها فقد كانت ترى هذا الامر سخيفا مبتذلا
هى فقط كان تتأمل أمواجه و هى تتصادم ببعضها و ترتطم بالصخور
ثم و فى النهايه تتحول للا شئ عند قدميها الصغيرتين
كانت تشعر ان تلك الامواج تشبه البشر كثيرا
فهى تتصارع و تتصادم و تحطم بعضها من اجل لا شئ فى النهايه
كانت تتألم بشده
و لم تستطع طرد تلك الافكارمن رأسها
ظلت سائرة تنظر الى البحر و الناس
كان هناك بعض الاطفال يلعبون و يقذفون شئ ما
و امرأه عجوز طاعنه فى السن جالسه على الارض
و هناك حبيبان جالسان يتأملان البحر فى رومانسيه
لم تعر لهم اهتماما
فقد كانت تتذكر ما حدث فتمتلئ عينيها بالدموع لكتها تتماسك و لا تبكى
اصدقائها و ذكريات الطفولة و جارتها التىكانت بالنسبه لها كصندوق اسرارها
نعم جارتها فقد توفيت اليوم اقرب انسانه لقلبها
كانت تشعر انها وحيده تماما .. من يمكن ان تشكى له بعد الان؟
و اصدقائها الذين تركوها واحدا تلو الاخر
هى لا تظن ان بإمكانها الوثوق فى احد مرة اخرى
و عندها تذكرته ..لا هناك واحدا يمكنها الوثوق فيه
واحدا فقد امتلك قلبها و استطاع استعمار وجدانها
عندها ابتسمت ..و قررت ان تتصل به تحكى له ما حدث و كانت ايضا تريد ان تسمع صوته بشده
و عندما كلمته هدأ من روعها .. و استمع لها باهتمام
عندها زال كل حزنها و شعرت انها ليست وحيده
و اكملت سيرها عائده الى المنزل..و قد اخذت عهدا على نفسها انها لن تنكسر او تنهزم مرة اخرى
و ان الضرب على الحديد يقويه
و نظرت الى الاطفال و الى الحبيبان فشعرت بالأمل و ابتسمت لهم
لا يمكن ان تضعف مرة اخرى
و عندما اقتربت الكرة من الحبيبان امسك الفتى بالكرة ليرجعها لهم مرة اخرى
فدخل فى بقعه الضوء..عندها عرفته
حبيبها الذى امتلك روحها .. الذى وعدها انه سيكون لها للأبد
فجأه توقفت الافكار عن التدفق فى رأسها
و لم تشعر بنفسها الا و هى تجرى بكل ما تبقى لها من قوه
لا تعرف كيف وصلت للبيت
و دخلت حجرتها و اغلقت الباب
لم تكن تبكي .. لم تكن تضحك .. لم تكن تشعر باى شئ فى الواقع
و من يومها لم تعد تتألم ..و عرفت انها لن تتألم مرة اخرى
هى لم تعد تعرف ان كانت سعيده بهذا أم حزينه
و لا تستطيع حتى ان تصف احساسها
فحديثها عن العواطف كحديث رجل اعمى عن لوحه زيتيه
فقد فقدت عواطفها للأبد
و من يومها عرفت ان هذا هو هروبها الكبير من جميع احزانها

الجمعة، 14 نوفمبر 2008


لو بطلنا نحلم نموت

الجمعة، 10 أكتوبر 2008

جنون 2 ...




كالمعتاد سمعته ذلك الصوت الوقور العجوز يطلب منى شد الغطاء استعدادا للذهاب الى عالمى الخاص..


اغمضت عينى و بدأت اشعر بذات الاحاسيس الهواء البارد و الموجودات الشفافه..


فتحت عيناى , هو عالمى كما عرفته ضبابيا غامضا مليئا بالاشجار والعصافير الملونة ... لكنه-للأسف- ازداد كئابه..


تكاثفت غيومه لتحجب الضوء لكن الرؤيه لم تنعدم بعد..لازلت استطيع ان ارى طريقي و اتعرف الموجودات من حولى..


كنت اسير محاوله الا اتعثر او اضل طريقي..


الهواء هنا بااااارد..ضممت ذراعى الى صدرى طلبا لمزيد من الدفء لكنى لم اشعر بأى تحسن .. حاولت ان اتناسي الامر برمته و اكمل طريقي...ان البرد و الخوف يسيطران على كل احاسيسي و ايضا الجوع..


انا جائعه .. حسنا ساقطف شيئا من تلك الاشياء الناميه على اشجارى ليسد جوعى .. بدأت اهز بعض الاشجار ليتساقط ما عليها من ثمار فتساقطت اثنتان من تلك الاشياء-التى لم استطع حتى الان تبين ما هى - على الارض فجريت لاخذها


يا الهى ! لا يمكن ان يكون هذا صحيحا !!


ان تلك الاشياء الناميه على اشجارى لم تكن سوى علامات استفهام!الكثير الكثير من علامات الاستفهام فى الواقع..


ان رؤيتها فقط تزيدنى جوعا ..


عندها خارت قواى فجلست بجوار شجرة عجوز مستسلمه لخوفى و جوعى و برودتى و اغمضت عيني...


و عندما فتحت عيني عرفت اننى عدت مرة اخرى الى غرفتى .. و نظرت الى المنبه بجوارى .. حسنا يجب ان انهض فهذه بدايه يوم آخر...........

السبت، 27 سبتمبر 2008

مقدرش على زعلك ابدا


مدونتى حبيبتى اختى الصغيرة اللى بفضفضلها و بحكيلها على احلامى و على جنانى و على كل حاجة انا اسفه
انا الفترة اللى فاتت اهملتك جدا بس ده و الله غصب عنى انا كنت مشغوله جدا
كان ورايا حاجات كتير اوى بس برضه انا لسه غلطانه خلاص بقه ماتزعليش منى علشان خاطرى مش هعملها تانى
يا قواقعى كلموها قلولها انى بحبها اوى و مقدرش على زعلها
يا ناس حد يكلمها و يخليها تسامحنى
يا مدنوتى يا حبيبتى ما تزعلييييييييييييييش
أنا أسفه

الخميس، 25 سبتمبر 2008

كام كلمه كده لزوم الفلسفه..


خمس نصايح سمعتهم قبل كده اثروا فيا جدا حبيت اعرضهم عليكم॥

من غير رغى كتير يعنى انا هاقولهم و هسيب التعليق ليكم॥

१) لا تسمح لاحد بان ياخذ الاولويه فى حياتك عندما تكون خيار ثانوى فى حياته

२)لا تبكى على اى علاقه فى الحياه لان الذى تبكى من اجله لا يستحق دموعك و الشخص الذى يستحق دموعك هو الذى لا يدعك تبكى ابدا

३) عامل الجميع بلطف و تهذيب حتى الغير محبوبين لديك , ليس لانهم غير لطيفين بل لانك انت لطيف و قلبلك ابيض

४) لا تبحث عن سعادتك فى الاخرين لانك ستجد نفسك وحيدا بل ابحث عنها داخل نفسك ستشعر بالسعاده حتى لو بقيت وحيدا

५) السعاده دائما تبدو ضئيله عندما نحملها بايدينا لكن عندما نتعلم كيف نشارك بها سندرك كم هى كبيرة و ثمينه

الأحد، 7 سبتمبر 2008

لما تبقى مبسوط..



لما تبقى مبسوط .. هتبص للحياه بطريقه مختلفه غير اللى كنت بتبصلها بيها قبل كده


ايا كان اللى مخليك مبسوط هتبقى انت نفسك مصدر سعاده للى حواليك





كفايه ابتسامتك المرسومة على وشك..

و نظرة الرضا عن كل اللى حواليك..

عن الحياه و الناس..

و حتى الارض و السما و الشمس و الشجر..






لما تكون مبسوط ..ابتسم من كل قلبك و قول..



انا مبسووووووووط:)

الاثنين، 25 أغسطس 2008

العيب فى مين؟؟




يا ناس حد يقوللى العيب فى مين..

فيا؟..

و لا فى الدنيا؟..

و لا فى البنى ادمين؟..

الجمعة، 22 أغسطس 2008

جنون...

فى البدايه .. اسمع ذلك الصوت الوقور العجوز القادم من اللا مكان يقول : " ارجو من سيدتى شد الغطاء استعدادا للانطلاق"....



و بدأت الرحلة ... حسيت بان كل حاجة حواليا رقيقة و الهوا اللى فى لسعة برد بيعدى على وشى و بيحرك شعرى, ساعتها بس عرفت انى هناك... عرفت انى وصلت...


بصيت حوليا ..هو ده .. هو ده العالم بتاعى ...بدأت امشى فيه شويه علشان اكتشفه ..و رغم انى هنا الاميرة الا ان العالم ده لسه اغلبه مجهول بالنسبالى...


و فضلت ماشية...قعدت ادور على بنى ادمين...مالقيتش..خفت...حاولت اتناسي خوفى...

فين الناس؟..

بصيت لاقيت عصافير كتير واقفة على شجرة عالية ديلها ملون و جناحتها كبيرة..اول ما شوفتها عرفتها دى احلامى...جريت وراها .. طارت ... قعدت اجرى حاولت احصلها .. اتكعبلت ..وقعت..لقيت حد بيقومنى..ببص لقيتهم اتنين اصحابى قريبين اوى ..
انتوا كنتوا فين ؟ انا كنت فاكرة نفسى لوحدى..احنا موجودين بس انتى اللى مدورتيش كويس...كل الناس اللى بيحبوكى موجودين...
قومى .. مقدرش ..طيرى ورا احلامك..بس انا مبعرفش اطير..خليكى واثقة فى قدراتك...غمضت عينى..
و نطيت عالى اوى .. و لما فتحتها لقيت نفسى طايرة...
انا طايرة..انا بعرف اطير!!
انا مبسوووووطة..لمست السحاب .. و وقفت عالشجر العالى .. قدرت امسك عصفورتين تلاتة... بس لسه فى عصافير تانية كتير اوى..
بس لما بصيت عالارض..لقيت اغلب عالمى ضلمة..مجهول معرفش عنه حاجة..استغربت...و فى عز مانا مستغربة...
لقيت واحد اول مرة اشوفه..واحد متسلل للعالم بتاعى؟؟..دخل من غير ما ياخد اذن الاميرة!!
نزلت اشوفه..لقيته ماسك فى ايده عصفورة غريبة...
اول ما شافنى ابتسم..ساعتها بس حسيت بقلبى بيدق لأول مرة..ابتسمتله..مد ايده يديلى العصفورة..جيت امسكها..
طارت..مديت ايدى امسكها بعدت .. ساعتها مسك ايدي و طرنا احنا الاتنين وراها نحصلها..
و بدأت الاجراس ترن....
تررررررررررررررررررررررررررررن!!!!!!
المنبه..فتحت عينى بصيت عالاوضة ...
هى زى مانا سبتها ..



الخميس، 7 أغسطس 2008

عمرها حصلتلك دى (مش اغنية تامر حسنى على فكرة)


يوم عادى زى اى يوم تانى .. بتكلم ناس و بتقابل ناس .. بتحصل فيه احداث كتير حاجات تفرحك و حاجات
تضايقك..و اهو يوم و بيعدى ...
بس تيجى تقعد مع نفسك بليل و تفتكر احداث اليوم كده..تفتكر حركة انت عملتها و انت مش قاصد فى بنى ادم
انت بتحبه اوى و تحترمه جدا..يا ترى اتضايق يا ترى زعل منى..
و دماغك تاخد و تجيب .. يا ترى هو شايفنى ازاى دلوقتى .. يا ترى زعلان منى و لا لا..يا ترى عداها عادى زى مانا
عدتها و لا.... و تبدأ الافكار الكئيبة تيجى فى دماغك فكرة ورا التانية ...
و ساعتها هتحس انك بتكره نفسك .. مخنوق بس ما بتعيطش .. فى حاجة خنقاك و مش مخلياك عارف تتنفس كويس..
كل ما تيجى تغمض عينك تفتكر اللى انت عملته .. تفتحها بسرعة و تحاول تفكر فى اى حاجة تانية ...
بس افكارك مش سايباك .. حاسس بتأنيب ضمير فظيع .. و تحس انك ساعتها مفكرتش قبل ما تتصرف..
فين عقلى ساعتها بس؟؟ و يبقى نفسك تشوفه تعتذرله..
اكيد حصلت معاكوا قبل كده..اكيد

السبت، 2 أغسطس 2008


البعيد عن العين عمره ما كان بعيد عن القلب..
فالبعيد عن العين ليس دائما بعيد عن القلب , و القريب من العين ليس دائما قريب من القلب فقريب القلب يبقى قريبا وان بعد عن العين ,,,, وبعيد القلب يبقى بعيدا وان قرب من العين

واجب مستر شيكو..



واجب !!!!

الكلمة اللى مرتبطة فى دماغى ارتباط شرطى بالتهزئ ( حلوة ارتباط شرطى دى ) ما علينا ....

و طبعا - كالعادة - لازم الواجب يتأخر...

واجب!!!! الكلمة دى رجعتلى ذكرياتى انا و حسؤلا و زى التذنيب و التهزئ و معرفش..معرفش..معرفش..معملتوش..معملتوش..معملتوش...

ده طبعا انا ثم حسؤلا ثم زى نظرا لأننا بننقل الواجبات من بعض...و يا ريتنا بننقله صح!

واجب!!!! لازم يعنى.... حااااااااااااااااااااضر هعمله ....

أقول 6 حاجات محدش يعرفهم عنى من أول ما يشوفنى..

1)اولا انا اللى هيشوفنى اول مرة هيشوف بنت قصيرة و رفيعة و شكلى رقيقة كده بس

انا بلعب كاراتيه و معايا حزام اسود و الشهر الجاى

هبقى كابتن ان شاء الله (قولوا يا رب)


2)أنا من أكتر خلق الله مللا بزهق من أقل حاجة و ده اللى بيخلينى احس ان اغلب الكلام اللى

بيتقال أتقال قبل كده و الحاجات اللى بتحصل حصلت

قبل كده

3)عصبيه اوى بس عصبيتى بتفضل جوايا عمرها ما خرجت و ده بيخلينى لما اتضايق
اتعب اوى

4)حالمه جدا يعنى انا بعيش فى خيالى اكتر من الواقع و فى الواقع بحاول احقق
خيالاتى

5)طمووووحة ... يعنى مش عايزة اعيش و اموت زى ولا كأنى جيت اصلا و يوم
ما بحس انى مش هحقق حاجة بتعب اوى


6)بحب اعمل اللى انا عايزاه فى الوقت اللى انا عايزاه طالما انا مش غلط و عمرى ما بعمل حاجة

الا اذا كنت مقتنعة بيها و لو ما اقتنعتش بعمل اللى فى

دماغى

خلصت ... خلصت ...

ايه ؟؟ بتقولوا ايه ؟؟ لسه لازم اديه ل6 بنى ادمين؟؟؟

و هو انا يعنى عمرى كملت واجب لآخره احمدوا ربنا ان انا عملت اللى فوق....






الخميس، 31 يوليو 2008


عندما تخفف نورك ليزداد لمعان احدا غيرك
...
فان العالم كله يزداد ظلاما

الجمعة، 25 يوليو 2008




عندما تلوم الأخرين و الظروف و المواقف
.....
فإنك بذلك تعطيهم القوة لقهرك ,
.....
فيجب عليك ان تتوقف عن لوم الاخرين
.....
و ان تتحمل مسئولية حياتك

السبت، 19 يوليو 2008

صباح الخير يا مصر....


صباح الخير على عيونك يا مصر...
يا بلادى يا ام الدنيا...
يا بلد الفراعنة...
اللى -للاسف-مايقدروش يفخروا بينا...
زى ما احنا بنفخر بيهم قدام العالم كله...
صباح التعليم البايظ....
و الامتحانات المتسربة...
صباح الناس المطحونة المدعوكة...
اللى مش طالبه غير حقها الطبيعى فانها تعيش..
صباح الفساد الموجود المنتشر زى السرطان...
فى كل حته فيكى يا بلادى...
و كأن خلاص الحياة ما تنفعش من غيره...
و اللى شمسك و ارضك و تاريخك اشتكوا منه و من ناسك....
كان نفسى اقولك صباح الرخاء و العزة و الكرامة...
صباح التقدم و الحضارة....
و الكلام ده اللى مصدعين بيه دماغنا فى كتب المدرسة....
و اللى ياريته كان بجد موجود...
مش مجرد كلام عالورق...حلم بعيد رسموهلنا...و وهم عيشونا فيه....
و على العموم خلاص متزعليش...
صباح الخير...
(على فكرة ده مش شعر ده خواطر جاتلى عالصبح)

الخميس، 17 يوليو 2008




I'm playing karate ...
and I'm a girl ....
and I love this sport

DO YOU HAVE ANY PROBLEM WITH THAT!!

خوفك..


ضهرك هينحنى من و قفة الشباك 
مع انى حذرتك
و شرحتلك بميت طريقة 
دى
مش وقفة المنتظر
دى وقفة الخايف و خوفك انت تحديدا سخيف
بارد
مالوش ريحة 
خوفك جبان زيك 
اجبن من انه يعلن عن نفسه بصراحة
اضعف من المشى وحده 
فى الشارع الفاضى
خوفك 
ما قدرش غير عليك 
اتغذى على كل احاسيسك
و قعد لوحده متربع فى قلبك 
و انت
باين عليك مرتاح كده
لدرجة انك نسيت مكان الباب
واقف ورا الشباك كأنك شبح
كأنك خيال
ما بقاش يخوف حد
                                       (شعر..محمد خير)

انت ياللى داخل مدونتى مش تخبط الاول ؟؟